Museum naziunal svizzer

ina directura / in directur dal Museum naziunal svizzer

21.08.2020 Sco instituziun dal dretg public cun atgna persunalitad giuridica è il Museum naziunal svizzer ina da las pli impurtantas instituziuns istoric-culturalas da la Svizra cun irradiaziun internaziunala. El unescha trais museums sut in tetg: il Museum naziunal a Turitg, il Château de Prangins al lai da Genevra ed il Forum per l’istorgia Svizra a Sviz - sco era il Center da las collecziuns ad Affoltern am Albis. Il museum preschenta l’istorgia Svizra dal cumenzament fin il di dad oz e fa accessibla cun exposiziuns temporaras e permanentas las identitads svizras e la diversitad da l’istorgia e da la cultura da noss pajais.
Perquai ch’il directur actual banduna il museum, tschertgain nus a partir dals 1. avrigl 2021 u tenor cunvegnientscha

ina directura / in directur
dal Museum naziunal svizzer
Il directur u la directura maina il comité directiv ed è – resalvà las cumpetenzas dal cussegl dal museum – responsabel/-la per la gestiun dal museum ed uschia per la realisaziun da las finamiras operativas e strategicas. I sa tracta d’ina incumbensa da manar multifara e pretensiusa cun blera autonomia e libertad d’acziun. Nus tschertgain ina persunalitad engaschada cun excellentas abilitads da management, divers onns d’experientscha en ina funcziun da cader d’ina instituziun culturala, ina buna chapientscha per la lavur da museum e viv interess d’intermediar las diversas fassettas dals contexts istorics ad in vast public. Impurtantas èn oravant tut vossas qualitads socialas e communicativas, il dun d’anticipar svilups sin nivel strategic e concepziunal en il rom dal svilup dal museum, vossa sensibilitad sch’i sa tracta da manar persunas sco scheffa/schef da 337 collavuraturas e collavuraturs. Ultra da quai tschertgain nus ina persuna creativa per la planisaziun d’exposiziuns futuras sco era cun grond’affinitad per las medias digitalas en general e las medias socialas en spezial. Per garantir il success dals museums represchentais vus ils interess e la lavur da moda credibla en l’ambient politic, tant en las medias, visavi ad in public vast sco era envers il parlament federal ed il Departament federal da l’intern ed era envers sponsurs e fundaziuns. Vus avais ina rait solida da contacts en il ravugl cultural naziunal en tut las regiuns linguisticas ed essas motivà/-da d’era sviluppar enavant la lavur sin nivel internaziunal. Nus spetgain in studi universitar terminà, d’avantatg cun doctorat, excellentas enconuschientschas dal tudestg e franzos e buna chapientscha dal talian ed englais. Chapientscha dal rumantsch è d’avantatg. Tar annunzias equivalentas vegnan dunnas sco era annunzias da la Svizra latina favurisadas.

Dokumentanhang laden

Institution / Name

Museum naziunal svizzer

Ansprechpartner

Nus spetgain vossa documentaziun d’annunzia fin ils 27 da settember 2020 e supplitgain da trametter quella en furma electronica al president dal cussegl dal museum, Tim Guldimann: tim.guldimann@nationalmuseum.ch. Per plaschair era duvrar quest’adressa per eventualas dumondas.

E-Mail

tim.guldimann@nationalmuseum.ch